पुणे | ३.३ | रयत समाचार
राष्ट्रवादी काँग्रेस अजित पवार पक्षाचे नगर शहर दक्षिण मतदारसंघाचे आमदार संग्राम अरूणकाका जगताप यांना ‘धर्मवीर छत्रपती संभाजी महाराज पुरस्कार’ जाहीर करण्यात आला. छत्रपती संभाजी महाराजांच्या स्मृतीनिमित्त राष्ट्रीयस्तरावर हा पुरस्कार दिला जातो. हिंदू कार्यासाठी व रक्षणासाठी काम करणाऱ्यांना हा पुरस्कार देण्यात येतो.
गेल्या काही दिवसांपासून आमदार जगताप हे कट्टर हिंदुत्ववादी भूमिका वठवत असून नगरसह राज्यातही ते या भूमिकेतून काम दाखवत आहेत. त्याची दखल घेऊन त्यांना पुरस्कार देण्यात येणार असल्याचे कळते.
पुरस्कार वितरण समारंभ १८ मार्च रोजी वढू (ता. शिरूर, जि.पुणे ) येथे मुख्यमंत्री देवेंद्र फडणवीस यांच्या उपस्थितीत होणार आहे. आमदार जगताप यांच्या सन्मानाबद्दल त्यांचे सर्व स्तरातून अभिनंदन होत आहे.